September 2, 2025 | 12:00am
INABUSO umano ng Camara de Representantes ang kapangyarihan nito. Kaya ibinasura ng Korte Suprema ang pag impeach ng Camara kay VP Sara Duterte.
Ora-orada umano nag-impeach ang Camara, anang Korte. Ni hindi man lang daw tinalakay ang sakdal sa plenaryo nu’ng Feb. 5.
Ang batayan ng Korte sa pasyang ito ay ang balita ng ABS-CBN Information nu’ng araw na ‘yon. Iginiit daw sa newscast na walang plenaryo. Pero dinala agad umano sa Senado ang sakdal ng Camara.
Ipinunto ito ng Korte sa Pahina 8, Narration of Information, sa 97 pahinang pasya. Nasa ilalim ang Footnote 30, ang hyperlink sa naturang ABS-CBN balita.
Screengrab from Senate livestream
Pero, kapag binuksan ang hyperlink, ito ang lalabas: ibinabalita ng ABS-CBN na nag plenaryo nga ang Camara nu’ng Feb. 5, at pagkatapos ay dinala ang Articles of Impeachment sa Senado.
Might tatlong video pa ang balita: ang pagsasagawa ng plenaryo, ang pagpirma ng mga Kongresista, at ang pinal na 215 pirma.
Kung gan’un pala, ano’ng pinagbatayang balita ng Korte?
Wala! Bula! Guni-guni! Kathang-isip!
Guho ang pasya ng Korte. Anumang pasya ay dapat batay sa katotohanan. Kung walang datos, walang pasya.
Sa Hudikatura ang balita ay tinuturing na rumour o pangalawang pasa lang ng impormasyon. Dapat bumatay ang Korte sa pangunahing supply – walang iba kundi ang opisyal na file ng plenaryo ng Camara at ang CCTV video nu’n.
Aaminin kaya ng Korte ang kawalan ng batayan? Babaliktarin ba nito ang pasya? Hindi naman nakakahiyang magpakumbaba. Ang pagpapakumbaba ay kagitingan.
Ika nga ng mga Tagalog, “Sa pag-ako ng mali, hindi nababawasan ang pagka-lalaki mo, nadadagdagan ang pagkatao mo.”
