Pilipino Star Ngayon
December 1, 2025 | 12:00am
MATAAS ang presyo ng mga bilihin. Ang P1,000 ay karampot na lamang ang nabibili. Kapag bumili ng limang kilong bigas, tapyas na agad nang malaki. Kapag bumili ng isang kilong galunggong, kape, asukal, asin, gulay, ubos na ang P1,000. Kung lima ang miyembro ng pamilya, ang P1,000 ay kulang na kulang sa pang-araw-araw na pamumuhay ng mga karaniwang Pilipino na kumikita ng minimum na suweldo. Paano pa kung nangungupahan at may mga pinag-aaral na anak. Paano ang pamasahe? Paano pagkakasyahin ang karampot na kinikita?
Ngayong Pasko, kahit paano naghahanda ang mga Pilipino. Hindi maaaring walang handa kahit na papaano. Pilit na maghahanda para may pagsaluhan ang mag-anak sa noche buena. Tradisyon na ang paghahanda sa bisperas ng Pasko.
Kung ang P1,000 ay kulang para sa pang-araw-araw na pagkain ng mga Pinoy, paano pagkakasyahin ang P500 para sa noche buena.
Ang P500 ay naging mainit na usap-usapan ngayon makaraang sabihin ng kalihim ng Department of Trade and Industry (DTI) na kasya ito upang makabili ng pang-noche buena para sa Pasko.
Sa panayam kay Sec. Cristina Roque noong nakaraang Huwebes, sinabi niyang sapat na ang P500 para makabili ng rekado sa karaniwang handa sa Pasko. Ang P500 ay makakabili na raw ng ham. Makagagawa na raw ng macaroni salad at spaghetti, depende kung ilan ang taong kakain. Nilinaw naman ni Roque na nakadepende pa rin ang budget sa bilang ng miyembro ng pamilya at sa mga ihahandang pagkain sa Pasko.
Maraming nag-react sa sinabi ni Roque na kasya ang P500 sa noche Buena. Saan daw nakuha ang computation na mapagkakasya ang P500 kung bibili ng ham para sa noche Buena. Mahal daw isang kilong hamon. Paano pa makakabili ng pang-macaroni salad at spaghetti. Nananaginip daw ba ang DTI Secretary. Naranasan na raw ba niya ang mamalengke o mag-grocery kaya.
Kahit daw bali-baliktarin ang mundo, hindi kakasya ang P500 para sa noche buena. Ang P500 ngayon ay karampot na lamang ang nabibili at hindi puwedeng makapagpasaya ng Pasko.
Isa naman sa magandang sinabi ni Roque ay nag-implement na raw sila ng prize freeze para sa basic at prime commodities hanggang Enero 2026 kaya sigurado raw na makatitipid ang bawat pamilya. Sabi pa niya, dapat maging vigilant ang consumers. Dapat alam nila ang tamang presyo. Lagi raw mag-check sa website ng DTI para malaman ang tamang presyo.
Hindi kasya ang P500 para sa noche buena. Sana madagdagan ang karampot na suweldo para maging masaya ang Pasko.
