Pilipino Star Ngayon
October 31, 2025 | 12:00am
MARAMING Pilipino ang gustong makapagtapos ng pag-aaral upang makakuha ng magandang trabaho at nang magkaroon nang magandang kinabukasan. Kapag walang natapos, mahirap makakuha nang maayos na trabaho. Kaya marami ang nagsisikap na makapagtapos ng pag-aaral kahit pa mahirap ang sitwasyon. Nagtatrabaho sa araw at nag-aaral sa gabi. Lahat ay gagawin para makatapos ng kolehiyo. Naniniwala silang kapag nakatapos ng kolehiyo, malaki ang oportunidad.
Isang magandang ginagawa ng kasalukuyang administrasyon ay ang masigurong lahat nang Pilipino ay makapag-aral. Hindi lang basta marunong bumasa, sumulat at magkuwenta kundi makapagtapos sa larangan na kanilang pinapangarap at inaasam. Gusto ng pamahalaan na lahat ng Pilipino ay makakuha nang sapat na edukasyon.
Noong Miyerkules, nilagdaan ni President Ferdinand R. Marcos Jr. ang Republic Act No. 12313 na nagtatatag ng Lifelong Learning Development Framework (LLDF). Layunin ng LLDF na isulong ang universal literacy at mapalawak ang access sa dekalidad na edukasyon para sa lahat ng mga Pilipino.
Nakasaad sa nilagdaang batas, na ang LLDF ang magiging gabay sa pagpapaunlad at pagpapatupad ng lifelong learning program sa mga lungsod, munisipalidad, barangay, at iba’t ibang institusyong pang-edukasyon sa buong bansa.
Sa ilalim ng batas, magkakaroon ng access sa early childhood care education—mula primary hanggang tertiary level. Magkakaroon din ng access sa adult education at technical-vocational education. Magbibigay din ng suporta sa mga underrepresented at marginalized groups. Ang pagkakalagda sa RA 12313 ay labis na pinuri ni Education Sec. Sonny Angara.
Noong Oktubre 18, 2024, nilagdaan ni Marcos Jr. ang Academic Recovery and Accessible Learning (ARAL) Act na naglalayong tugunan ang mga kakulangan sa pagkatuto dulot ng nagdaang pandemya. Ang ARAL Act ay prayoridad na hakbang na tinukoy ng Legislative-Executive Development Advisory Council (LEDAC). Ito ay para sa mga mag-aaral mula Kindergarten hanggang Grade 10, partikular na bumalik o nagbabalik sa paaralan matapos magpahinga. Gayundin ang mga hindi umabot sa minimum na antas ng kasanayan sa pagbasa, matematika at agham; at ang mga bumabagsak sa mga pagsusulit batay sa buong taon ng pag-aaral.
Masigasig ang pamahalaan na mapaunlad ang kaalaman ng mga Pilipino sa pamamagitan ng pag-aaral. Matugunan din naman sana ang kakulangan ng mga silid-aralan at mga mahuhusay na guro. Ngayong nabulgar na ang kabuktutang ginagawa ng DPWH kaya nagkukulang ang classrooms, malutas na sana ito sa lalong madaling panahon. Huwag nang iasa sa DPWH ang paggawa ng mga silid-aralan.
