August 10, 2025 | 12:00am
NASA mapanganib na kalagayan ang mamamayan ng Dinapigue, Isabela kung saan nagmimina ang Dinapigue Mining Company (DMC), subsidiary ng Nickel Asia Corporation (NAC) na pag-aari ni Manny Zamora. Kalbo na ang mga bundok doon dahil sa pagmimina.
Naninindigan naman ang DMC-NAC na nasa labas ng Sierra Madre Nationwide Park ang kanilang minimina at naaayon ang 25-years mining allow sa prinsipiyong responsible mining.
Ayon naman sa lokal na pamahalaan ng Dinapigue at DENR, pinayagan nila ang DMC-NAC dahil dumaan ito sa tamang proseso na nakasaad sa Republic Act 7942 (Philippine Mining Act of 1995).
Subalit nababagabag ang mamamayan sa trahedyang idudulot ng pagmimina ng DMC-NAC. Nakikita nila ang malawakang pagkakalbo ng kagubatan sa bahagi ng Northern Sierra Madre sa Dinapigue.
Tanong ng mga residente, ano na ang magiging itsura at kalagayan ng lugar sa hinaharap? Ano ang mangyayari sa Sierra Madre na nagsisilbing panangga ng Hilagang Luzon sa mga malalakas na bagyo?
Hindi lamang taga-Dinapigue ang malalagay sa panganib sa walang patumanggang pagmimina ng DMC-NAC, kundi pati na rin ang mga taga-Rizal at Metro Manila. Magdudulot nang matinding pagbaha ang ginagawang pagmimina.
Maraming malalagay sa panganib dahil sa ginagawang pagmimina. Kumilos sana ang DENR ukol dito. Hindi ito dapat ipagwalambahala at ipagkibit-balikat.
