September 7, 2025 | 12:00am
ISANG lalaki sa China ang nanganganib na maubos ang lahat ng kanyang ngipin matapos niyang subukang gumawa ng sarili niyang pustiso gamit ang isang uri ng resin na binili niya on-line sa halagang 5 yuan (humigit-kumulang P40).
Ayon sa isang dentista na si Ms. Liu, dumating sa kanyang klinika ang isang matandang kliyente na ang mga ngipin ay nabalot ng isang matigas na kulay brown na substance.
Nais umanong makatipid ng lalaki sa mamahaling dental process kaya nagpasya siyang gumawa ng sarili niyang pustiso. Subalit, naging palpak ang kanyang ginawa at napilitan siyang humingi ng tulong sa propesyonal.
Ang resin ay isang uri ng artificial polymer na nagiging matigas at matibay sa pamamagitan ng proseso ng polymerization, kaya ginagamit sa dental supplies.
Bagama’t gamit ito sa paggawa ng pustiso, delikado kung hindi propesyonal ang gagamit.
Sa kasamaang palad, maging ang mga dentista ay nahirapang tumulong. “Sinabi niya na hindi naglakas-loob ang ospital na galawin ito, at sinabi ko na wala rin kaming magagawa,” sabi ni Liu, na ibinahagi ang kuwento on-line bilang isang babala sa publiko.
Dahil sa nangyari, nanganganib ngayon ang lalaki na maubos ang lahat ng kanyang ngipin, kung mayroon mang maglalakas-loob na tanggalin ang matigas na resin.
Ang kanyang kaso ay isang matinding paalala na ang mga medical at dental process, bagama’t magastos, ay dapat lamang ipaubaya sa mga lisensiyadong propesyonal.